Pou tou sa

An té ké vlé’w pou fanm, kouzin ou sè
Vou ki sé nich a plézi, ki nich a dousè
An té vléw plis ki flanm a lisifè
Pou maké doulè é tout kout fè
Jodila é plis ki yè
É pou demen moun pa dèyè
Ni san mil rézon pou sa pa finn
Dimil fason pou fè konbinn

An té ké vlé’w pou fanm, kouzinn ou sè
Pou si yo té vlé baréw anko
Pou roudi yo ban mwen lè, dako !

An té ké vlé’w pou marèn ou pou mabo
É pou yenki dé t ibo
Konbinn an nou kont konbinn a yo
Mi sé sa ou toujou sèvi yo

An té ké vlé’w pou métrès lékol
Épi pann an do aw kon lakol
Swiv toubonnman chimen aw
Maché trankilman koté aw

An té ké vlé’w pou matant ou pou konmè
Pou belsè, vwazin oubyen belmè
É tan vou palé kon lawouzin
Jis apré rékot a kann a lizin
Mi sé konsa, ében mafwa
Ou té ka lité, chak fwa, chak fwa
Lité kont chenn a yo
Pawol a yo
Lajan a yo
Lalwa a yo
Chyen a yo
Fizi a yo
Lidé a yo
Lité kont yo

An té vlé’w pou fanm, kouzinn ou sè
Kon belmè, kon mabo oubyen belsè
Ou sé onlo fwa plis ki sa
Mé, an té ké vléw pou tou sa.

Maasaï
Mars 2002