Origine du document
Site : http://ugtg.org
Page : spip.php?article1170
URL complète : http://ugtg.org/spip.php?article1170
Jénès Kont Pwofitasyon (JKP) déklaré : Jenn Gwadloup lè la rivé !
Déklarasyon a mouvman Jénès Kont Pwofitasyon ki owganizé on sanblé mewkrèdi 18 a mwa novanm an lokal a téren Sionis, Zabim’. On kontré pou prézanté sans é lespri a kréyasyon a mouvman la sa ; men osi an mémwa é omaj a asasina a Charles henry SALIN. Chalres Henry SALIN, on jenn liséyen Gwadloup kè on jandam’ asasen nonmé Michel MAAS ekzékité on swa an ba pon a Chovel, la L’ADGUPS yé aktyelman, alòs kè i té sòti o sinéma é téka rantré a kouché. An giz dè kondanasyon, léta fwansé pa kontanté’y mandé tribinal ay akité asasen la, men mandé osi lawmé ay ba Michel MAAS on pwomosyon...
Jenn Gwadloup lè la rivé ! An nou aji avan twota maré nou ! Sitiyasyon-la grav pou jénès an nou !
« Keskiyanna ? »
On jénès ki normalman dwèt-èt rèprézanté dèmen an péyi ay, on jénès ki pou vin gran fanm é gran nonm a dèmen, on jénès ki pou rèprézanté fôs a travay, on jénès kon admiral ka di, ki dwèt-èt fôs a péyi-la. Sé li menm ki jodila ka hélé mizè é dézèspwa « an pa ni hak a pèd an la ka surviv ».
Sitiyasyon la vrèman grav ! « Ola nou soti ? Ola nou kay ? »
Diféran trip ka tchouyé jénès an nou :
- Ti manni fennyan an nou la
- Manni fè lékol dèyè tablo-la
- Pa sav ki moun nou yé é enki adopté tout mès é labitid étranjé (sa yo ka kriyé « aliénation »)
- Yo fèmé nou adan diféran lajol : alkol, dwog, vyolans, chomaj… é nou lésé nou alé adan
- On jénès oubliyé ki ka sibi enjistis
- Lajan ka fè défo
- Nou pèd valè a nonm
- Mank dè motivasyon pou pran péyi-la an men padavwa yo fè nou kwè nou pa kapab
- Yo fè nou konprann sa pli bèl réisi tousèl « konplo a nèg sé konplo a chyen » é « sé zanmi ki fè si krab pa ni tèt »
- On jénès ki lè’ y vlé rivé a bout i ka rètrouvé-y tousèl é ki bizen tann « kontinyé goumé zanmi ! » é dot ankô…
Mésyé gèy vi an nou ! Gèy jénès an nou ! « ki wol sa menm ? » Nou las épi sitiyasyon lasa ! Sé pousa JKP ka bay la vwa jodila. I lè pou nou responsabilizé nou é pousa nou bizen :
- Afiwmé nou rètrouvé nou é fè yo rèspèkté nou. Jodila, nou las atann si moun,
- On lédikasyon adapté a kilti an nou é istwa an nou,
- Fè konsyans maché,
- Konnèt nou,
- Rètwouvé on lawmoni,
- Vin nonm é fanm doubout,
- Woupwan konfyans adan nou, adan pèp an nou, adan divini an nou é ta péyi an nou.
Nou vlé vwè pèp-la lévé ! « Ka-y di ? Ka-y ka fèt ? »
Objektif an nou :
- Sé ké kréyé on lékôl mawon pou pé rèsponsabilizé jenn gwadloupéyen,
- Ranfowsé solidarité,
- Kréyé on rézo a guadeloupéen,
- Aprann on jenn a afiwmé-y an tan kè guadeloupéen pou-y pé pran péyi ay pou ta-y
- Kréyé on sendika a étidyan, liséyen, koléjyen
- Kréyé dé manifestasyon kiltirèl artistik spowtif adan lèspwi JKP pou mèt jénès la a lonè é sa osi adan lé médya (radyo, télé, enternèt)
- Nou pati pou goumé Kont Tout Pwofitasyon ! Jènn chomè é travayè ka sibi (diskriminasyon a lanbôch, pwoblèm pou enséré an sosyété-la…)
Pou sa nou bizwen fôs, nou bizwen zôt, nou bizwen jénès a péyi lasa !
Lapwent, 18-11-09
J.K.P.