Origine du document
   >Site : http://ugtg.org
   >Page : spip.php?article1476
   >URL complète : http://ugtg.org/spip.php?article1476

Léwoz a UGTG : Vandrèdi 1é juiyé, 9èd swa ! Annou fèmé lawond !

 

Sé vwè, Pèp Gwadloup chouké avè kilti, mès é labitid ki tay, ki konstwi lanné asi lanné, jénérasyon asi jénérasyon avè tipilo kilti, mès é labitid a Pèp Caraibe, Pèp Afrique, Pèp Inde é Pèp Europe ;

Sé vwè, lesklavaj, kolonizasyon, lasimilasyon é mondyalizasyon prévwa voyé douvan kilti, mès é labilitid a loksidan é éséyé détwi kontribisyon a pitit à Pèp Caraibe, a Pèp Inde, a Pèp Afrique, padavwa pou kolonyalis Éwopéyen, pou enpéryalis, nou pa moun menm jan ki yo, kilti an nou ka fwenné komès a yo ;

Sé vwè loksidan détwi sosyété, dékatyé Fanm é Nonm, pou tousa ki lavi fonksyoné jan i désidé ;

Sé vwè, on Pèp san kilti, san mémwa, an Pèp ki pa kapab voyé douvan sa i ka kwè ki bon pouy, sé on pèp ki toupwé lanmô ; Sé pousa Nou Gwadloupéyen douwé pran lontan plis konsyans a fondé a kilti an nou.

Padavwa kilti sé lavi...

Padavwa kilti sé lyannaj a pèp, padavwa kilti a chak pèp sé richès a limanité...

Padavwa, kréyol annou, tanbou annou, jan nou ka dansé’y, jan nou ka chanté’y… sé nou !

UGTG ka mandé Travayè, Jenn, Jouwa-Makè-Chantè, Fanmi... sanblé an lwond la pou kontinyé nouri kilti annou pou baré van a démounaj, a lasimilasyon, a mondyalizasyon ki kapitalis é kolonyalis fwansé owganizé an Péyi annou !

Wi kilti a Pèp Gwadloup vivan

Nou sé Nou…Nou sé Moun

Nou sé Gwadloupéyen

Vandrèdi 1é juiyé 2011 a 9èd swa douvan Palè Mityalité Lapwent :

Avè lé Mèt a KA
Nou ké sanblé
Lantou son a tanbou-la
Pou travayè pran fos
Pou konbat pwofitasyon

Annou fèmé lawond… Annou fèmé lawond… Annou fèmé lawond…

Publié par la Centrale UGTG le lundi 20 juin 2011

Forum article

Aucune réaction pour le moment !