Origine du document
   >Site : http://ugtg.org
   >Page : spip.php?article684
   >URL complète : http://ugtg.org/spip.php?article684

Jénès gwadloup, konba la sé tan nou osi !

 

Jénès gwadloup lévé, mobilizé, la lit komansé, fo nou ay o konba : piti a piti nou ké gannyé lit la !

Mobilizasyon a pa selman pou apa, anman é lé sendika.
Konba la sé tan nou tout, sé pou nou menm annou osi !
Sé vré, tini pwoblèm a ésans là pou nou arété sèvi vach a lèt a la SARA, ki ka angrésé si do annou évé konplosité a éli annou ; ki konèt manjé yo ant yo pou vwa annou, men lè sé pou kouyoné nou, sa fé konplo a chyen !

Fo nou finn’ évé imaj a an jénès pasif ki ka yenki atann kè bato la rivé !
Alé kilé diplòm’ a lékol kay vinn o rabé, Darkos préféré kantité ki kalité men sé nou ké péyé sa !
An gwadloup nou byen kontan ni on gran lékol a lotèlri, men pa ni lotel ankò. Yo tout ka fèmé yonn apré lòt. Tini osi on gran lékol agrikol.
Tou sa byen bèl, mé yo ka vann fonsyé gwadloup pou rézidans, biro, é ghetto a kolon.

Wi, i ja tan kè nou arété sèvi mendèv ba dòt péyi , kè politik annou swété entélijans a jénès la pou vann li a létwanjé !

Lot pwoblèm la, sé ki alé kilé tout moun ka tann kè en FWANS lwayé , chaj, ésans… : tout biten ka bésé padavwa tini kriz ékonomik, alòs kè an gwadloup tout biten ka kontinyé ogmanté !
Yo konèt di nou apliké lwa fwansé , lè i ka saji dè bésé salè, dè ogmanté chaj , ésans, rédwi finansman a lé kolektivité é dot diab é sé konn, men lè tini bès é bon biten en Fwanss, pa ni pou nou !
I té ké tan kè nou di la Fwans kè i pa ni manman nou ni bèlmè annnou.

Jénès gwadloup : fo nou arété fé moun pwan nou pou pòtré !
Si a pa on mannyè détouné dè angrésé konbòch a yo, alos kè santènn gwadloupéyen ka viv an lari, milyé san bwè é manjé, dizènn milyé an mizé, santènn milyé an prékarité ; tou sa, an pwop péyi a yo ?

Jénès, konba sé komansé nou komansé , fo nou sanblé évè lé 31 sendika, owganizasyon è asosiasyon kiltirel pou fé tann vwa an nou osi : Sé divini annou kay jwé, sé ta pòtmoné annou osi !

Fo pa nou rété si twotwa ka konté avyon an syèl é espéré bato la rivé. Non, fo nou monté o kréno é mandé la SARA et tou sa ka ki ka volé nou : ola lajan an nou pasé, é ranbousé nou !

Fo nou sanblé épi lé pli gran kini labitid lité pou pen a yo, pen an nou : an nou krévé bobo la pou 2009 pli néf.

Jénès gwadloup : Ansanm nou ké lité , ansanm nou ké gannyé !

Dah
Désanm 2008

Publié par Dah le vendredi 19 décembre 2008
Mis à jour le dimanche 18 janvier 2009

Forum article


  • >Jénès gwadloup, konba la sé tan nou osi !
    24 janvier 2009, par sportif gwadloup



    Site à visiter : foss a peyi la

    konba la sé ta tout gwadloupéen injistis an peyi la fo sa arrétté mwen mem ké mo pou la race kon les ancetre goumé an bas sé kou fwèt la
    ensemb nou ké lité ensemble nou rivé

    foss ba pèp gwadloup