Origine du document
Site : http://ugtg.org
Page : spip.php?article619
URL complète : http://ugtg.org/spip.php?article619
Sanblé adan é alantou Asosiyasyon, Sendika, Mouvman politik é Kiltirèl ki sinyé, ka déklaré :
Péyi annou kolonizé dèpi 373 lanné,
Kolonizasyon la sa owganizé pa boujwazi é Léta fwansé, é dot péyi Léwòp,
Kolonizasyon la sa sizé si lajan é rasizm,
Kolonizasyon la sa pwan pyé asi jénosid a nasyon Karayib,
Kolonizasyon la sa pwan plis fòs ankò, asi lesklavaj a zansèt annou, négriyé raché an péyi Lafwik yo fè pasé pou bèt san nanm,
Kolonizasyon la sa dévlopé’y adan lespwatasyon é lopwésyon a onlo dot travayè yo chayé an Péyi Gwadloup kon travayè zendyen,
Kolonizasyon la pa bout magré rébélyon a esklav ki gannyé libèté é abolisyon,
Kolonisasyon la pa chwé épi ‘’lasimilasyon’’
Kolonisasyon la pa étenn èvè ‘’réjyonalizasyon’’
NOU toujou kolonizé pa Fwansé !
Pépa ni libété, pépa ni dignité, pépa ni rèspè anba kolonizasyon !
Pouvwa kolonyalis fwansé jodi jou :
Ka anpwazoné tè an NOU, anpwazoné lèspri an NOU,
Ka voyé rèstan a manjé a yo an vwak ouben an bwat pou fè kwè yo ka nouri NOU,
Ka voyé chef ban NOU,
Ka voyé manblo pou bat NOU,
Ka désidé ban NOU ; konsidiré NOU pa moun.
Tou pannan, YO
ka volé fòs an NOU,
ka désimé jénnès an NOU,
ka pouwi kò a Fanm é Nonm an NOU,
Ka méprizé NOU,
ka tchouyé NOU,
ka détwi Péyi an NOU.
NOU GWADLOUPÉYEN, NOU
Sanblé oswè, jòdi 21 Oktòb 2008, ka angajé NOU,
Pou di é fè tousa ki fo
Pou NOU
Libéré NOU !!!
JOU NOU KÉ MÉTÉ A JOUNOU PÉ KÉ VWÈ JOU !!!
ANNOU KONTINYÉ NOURI LALIT, NOU KÉ GANNYÉ !!!!!!!
Lapwent, 21.10.2008