Rézistan !!! Kont Piki Fosé Ka Di Mèsi

asi sispansyon a profésyonèl lasanté, sosyal é médikososyal an Gwadloup.

Òktòb 2021 - Mé 2023 : 18 mwa san travay, san dwa, san
protèksyon, ni minimòm socsyal... Lavi an pann !
❖ Juyé 2021 - Jen 2024
 3 lanné konba.
 3 lanné solidarité.
 3 lanné konfrontasyon.
 3 lanné vérité kont mépri, manti, manipilasyon,
réprésyon.
 3 lanné Fanm é Nonm Gwadloup vèwtikal.

Ki chimen, ki lidé, ki fòs pou, nou gwadloupéyen, pa janmen mété jounou
a tè ?
Kanmarad, Travayè a Sèktè Sosyal, Médikososyal, Swanyan Libéral, Pèp Gwadloup, jou rivé pou nou pé é dwètèt di MÈSI .
WI MÈSI pou kouraj zòt pòté pou nou, pou nou té ay chèché an fon a kò an nou , an fon a kyè an nou, an fon a toutkalité fanm é nonm nou yé, an fon a istwa an nou, an fon a konésans an nou, an fon a valè an nou, an kijan pou nou rété doubout, an ki jan pou fasadé avè nou menm.
Wi, nou touvé ... nou touvé Bik a Rézistan. Nou touvé Bik a konsyans. Nou touvé Bik a solidarité. Nou touvé Bik a Denis Deloumeaux. Nou touvé travayè, rètrété, chomè, jenn. Nou touvé timoun lékòl, liséyen, étidyan. Nou touvé rèstoratè, trétè, patisyé, machann, awtizan,marenpéchè, bouché, avoka, dòktè, syantifik, sosyolog, psikològ, group a mas, group a priyè, group a fanm, panafrikanis,
Nou touvé mékanisyen, plonbyé, élèktrisyen, mason, transpòtè, enjényè, mèt é métrés lèkòl, travayè lakomin, lotèl, bank, sèkirité, ponpyé, nétwayaj, travayè a sèktè agrikòl, komès, militan é délégé a sendika a kolèktif a owganizasyon an lit.

Kidonk, nou trapé fòs é nou pa menm konprann ki jan fòs té ni tousa sans pou nou.

Lè on moun ou pa konnèt, on moun ki pa ni ayen, on moun ki té ka pasé é té pé ba-w ziyanm, mango, zaboka, fouyapen, dlo, on plenmen pwadibwa, diri, on saché lanti, 10, 20, 1000, 3000 éwo, jouwé pou timoun, liv lékòl, kayé, pwennbik, kat sinéma, médikaman, lenj ,sèrvièt ijyénîk, frijidè, télé é menm on vwati.
✓ Nou touvé moun ki fè nou ri, moun ki fè nou réfléchi, ékri kréyòl, gadé zétwal é lalin, é pran sans a lavi. Moun ki fè nou dansé, ki fè nou fè jimnastik, dansé kadri, dansé léwòz, dansè konpa, chanté, fè chèz é ban avè palèt, é ba palèt, wou é vyé vwati valè a matéryo ésansyèl.
✓ Nou aprann fè gato, fè pen, kwafé, masé
✓ Nou défilé, fè dièz, fè bèlbèbèl
✓ Nou palé an télé, an radyo, douvan misyé lèjij, nou monté Mach tribinal,
✓ Nou baré chimen, nou konprann ka sa vlé di réprésyon, ka sa vlé di délenkan, ki valè a jénès an nou, touséla yo ka di sé timoun ki pèd, yo té la. Yo pran lakrimojèn, yo fè lajòl yo pèd travay a yo, yo pèd libèté a yo.
✓ Nou touvé fòs an péyi andéwò, Matinik, Fwans, plen koté ankò si latè. Nou jous vwè politisyen é déotwa mè Gwadloup é nou aprann ka sa yé lwa, dèkré, séna, sanblé nasyonal, nich pawlemantèw, .....

Wi, Gwadloup nou douwé di mèsi, selman, MÈSI !

Rèstan a mèsi-la andidan a mémwa an nou.

Rèstan a mèsi-la, i an zyé a fanmi an nou, mari, madanm, papa, manman, timoun ki rètrouvé nou plibèl, piplis vayan, piplis détèwminé, piplis angajé avè yo pou fasadé avè tribilasyon a lavi.
Wi Travayè, Pèp Gwadloup, jòdila nou tout ka travay. Déotwa adan nou désidé pati épi on bon lendèmnité oben, té pisimé alé travay dòt koté, alé prévwa lavi, toujou san piki fòsé .

Nou di NON, é nou kenbé !
Piki fòsé AWA !

Piki a Macron Awa, piki a Delfraissy, a Lacombe, a Romana, a Gordien a
Blanchet, piki a « OMS », a Véran, a lé « nou bon é pisa » é tout banélo a

yo ! : AWA.
É jòdla, 3 lanné apré, nou ka tann di nou té ni rézon.
Men détwa ka kontinyé di apa piki-la yo kriyé ARN mésajé a yo-la ki pèkli é tchouyé tandi gwdloupéyen
Nou té tini rézon, davwa nou ka kwè adan sa yo ka kriyé konsyans, libèté, entélijans, « libre arbitre », lyannaj a kò é lèspri, lyannaj a kò é laliwondaj é, ka sa yé dékaré kò, dékaré lèspri, dékaré konsyans.
Nou té tini rézon davwa nou vwè an ki jan « fascisme, racisme, totalitarisme », manipilasyon, dépravasyon, négasyon a limanité an nou adan ADN a lòksidan.

Nou té vwè-y avan yo.

Lagè an « Ukraine », lagè a Gaza, lagè an kanaky, mizè an « France », Pèp Afriken ka fè yo foumalkan, é sa dèpi Macron té di an maws 2020 « nous sommes en guerre ».
Nou té vwè-y avan Macron té kalbandé sanblé nasyonal é dékatyé enstitisyon a péyi « France », pawti politik fransé é wouvè bwa a péyi « France » pou fachis, racsis a fron nasyonal.
Nou té vwè-y dèpi yo ekstèrminé amérendyen, koupé jaré a nèg Mawon, tchouyé travayè an 1910, 1925, 1930, 1952, 1967, 2009, ... dèpi yo tchouyé Charles Henri salin, Klodo é tou lézòt.

Wi sé mémwa an nou osi ki fè nou vansé ....

FÈ MÉMWA MACHÉ, FÈ KONSYANS VANSÉ an filiyasyon a 50 lanné a UGTG, 50 lanné a UTS-UGTG. Plis ki 50 lanné a lit a travayè Kont tout pwofitasyon, dèpi mak a 3 syèk è dimi esklavaj, 78 lanné « départementalisation » é « nos ancêtres les gaulois ».
Kidonk nou désidé mawon, kaskòd, kontinyé bwè ronm fè sòsyé toupannnan nou té ka bwè virapik, grenn anba fèy, atoumo, douvan nèg, awtémizya, twatas, ....., é pou bon, kouté syans a gran fanmi an nou, a Henry Joseph, a Péronne, a Raoult, a Henrion Caude, ......

É an menmditan, nou maché, maché é palé an tout komin, dèpi Lansbètran jis Vyéfò.
E an menmditan, nou fléché Lakou Santé é nou arété pisé si médikaman ki alantou a kaz an nou, planté é bokanté mèdsin an nou.
Ou ka tou konprann yo pa konprann ki kalité fanm é nonm nou yé é poukisa nou pa ka pléré mizè é mandé yo padon.
Sé davwa sé syantifikman, légalman, politikman, sosyalman, yo mizé pou nou té fè dèyè, sèlman, sé avè konviksyon syantifik, politik, jiridik, sosyal é limanité an nou, nou konprann é nou di nou pa ka lagé
Jòdila, Travayè, Pèp Gwadloup si nou ka di mèsi pou tout fòs nou trapé, nou ka di mèsi anplis pou kalité fanm é kalité nonm Gwadloup nou gannyé. Nou ka di mèsi pou kalité travayé santé é travayè sosyal é médikososyal ki éklò.
Jòdila, nou véyatif, nou owganizé sendika an nou, nou woulyannné avè kolèg an nou yo oblijé pran piki pou travay.
Nou konmansé mandé Kont, ki an grèv, ki douvan tribinal, pou atrosité é méchansté yo fè nou sibi.
É sé konsa nou sòti gannyé titilarizasyon a plis ki 300 kontraktyèl an CHU yo té prévwa pou ranplasé « les suspendus » é mété yo dèwò apré. Sendika a kolèktif anlit ka gannyé plis adéran, plis délégé é lontan plis pouvwa pou défann dwa a travayè é dwa a lavi .... « Les suspendus » viré o travay é la, toujou la.

Travayé é Pèp Gwadloup, sé plis ki 480 travayè yo sispann an Oktòb 2021 an Gwadloup
é sé plis ki 20 milyon éwo yo volé ...... YO KÉ PÉYÉ !!!!
Jòdila nou doubout Gaya é an balan men nou pé ké janmen oubliyé kanmarad an nou ki mò ni lé 1043 gwadloupéen yo tchouyé an 3 mwa san swen, san oksijèn, san ivèwmèktin, san vitamin C, san vitamin D, sans zenk, ....., davwa yo té swadizan ni « comorbidités » davwa yo té tro gro, davwa yo té ni dyabèt, davwa yo té tro vyé é davwa suwtou yo pa kouté Romana
ki di granbonè « kouri ay pran piki ”.
➢ Nou pa ka obliyé kanmarad an nou ki pèd kaz a yo, ki pèd fanmi a yo, ki pèd lanmou yo té tini an kyè a yo é ki ka kontinyé douwé léta avè enpo é labank pou tibwen lajan prété.
➢ Nou pé pa obliyé Gwadloupéen ki fè lajòl é ki an lajòl toujou.
➢ Nou pa oubliyé kolèg, kanmarad, ki monté an filao.
➢ Nou pa ka obliyé an ki jan Cotellon, Chalus, Losbar é dòt ankò, monté konplo èvè Macron, Lecornu, Carenco pou démantibilé nou, démanbré nou, démouné nou...
MI KONSA NOU PRAN CHIMEN A LIBÈTÉ, CHIMEN A KONÉSANS, CHIMEN A
KONSYANS, CHIMEN A LALIT, ANSANM ANSANM, CHIMEN A LYANNAJ AVÈ PÈP
GWADLOUP, CHIMEN POU KALBANDÉ SISTÈM KOLONYAL É KAPITALIS A FWANSÉ AN GWADLOUP !

NOU LA. NOU LA. NOU PÉ KÉ LAGÉ !!!

Lapwent, 27.06.2024

KONSEY SENDIKAL UTS-UGTG